სამსახურის უფროსი ლელა ჯანაშვილი, პირველი მოადგილე ოთარ ჩახუნაშვილი, მოადგილე გელა გელაშვილი, ასევე სამსახურის სხვა წარმომადგენლები სოფელ ქვეშის საჯარო სკოლას ეწვივნენ და მოსწავლეებთან და მასწავლებლებთან შეხვედრა გამართეს.  

ლელა ჯანაშვილის განცხადებით, საგანმანათლებლო სფერო პერსონალურ მონაცემთა დაცვის სამსახურისთვის ერთ-ერთ მთავარ პრიორიტეტს წარმოადგენს. ერთის მხრივ, მოსწავლეთა პირადი ინფორმაციის ხელშეუხებლობა და მეორე მხრივ თავად მოსწავლეებში მონაცემთა დაცვის კულტურის განმტკიცებას განსაკუთრებული მნიშვნელობა აქვს და ამ მიზნით სამსახური სხვადასხვა ტიპის აქტივობებს ატარებს.

სამსახურის ექსპერტ - ანალიტიკოსებმა ნინო ცაგარეიშვილმა და გვანცა გაბაიძემ მე-7 - მე-12 კლასის 70- ზე მეტ მოსწავლეს პერსონალურ მონაცემთა დაცვის მნიშვნელობაზე ინტერაქციული გაკვეთილი ჩაუტარეს და სამახსოვრო, ბრენდირებული საჩუქრები გადასცეს.

აღსანიშნავია, რომ სოფელი ქვეში შიდა ქართლში საოკუპაციო ხაზთან მდებარე სოფელია და საჯარო სკოლაში მოსწავლეები სოფელ ქვემო არცევიდანაც დადიან.

საგანმანათლებლო დაწესებულებებში ტრენინგებსა და ზოგადად არასრულწლოვნებისათვის განკუთვნილ სხვადასხვა აქტივობებს, პერსონალურ მონაცემთა დაცვის სამსახური მომავალშიც აქტიურად გააგრძელებს.