ხელოვნური ინტელექტის გამოყენების პროცესში პერსონალური მონაცემების დაცვის თემაზე, სამსახურმა ევროპის საბჭოსთან თანამშრომლობის ახალი მიმართულება დაიწყო
2021-12-09 13:03:10
ხელოვნური ინტელექტის გამოყენების პროცესში პერსონალური მონაცემების დაცვის თემაზე, სახელმწიფო ინსპექტორის სამსახურმა ევროპის საბჭოსთან თანამშრომლობის ახალი მიმართულება დაიწყო. ახალი ინიციატივის პრეზენტაცია საჯარო და კერძო სექტორის, აკადემიური წრის, საერთაშორისო და სამოქალაქო ორგანიზაციების წარმომადგენლების მონაწილეობით გაიმართა. ღონისძიება სახელმწიფო ინსპექტორის მოადგილემ, სოფიო ჯიაძემ და ევროპის საბჭოს ოფისის ხელმძღვანელის მოადგილემ, სტეფან სირბუმ გახსნეს.
ხელოვნური ინტელექტის გამოყენება სხვადასხვა სფეროში ყოველდღიურად იზრდება, რაც ამ მიმართულებით ადამიანის უფლებებისა და თავისუფლებების დაცვას კიდევ უფრო აქტუალურს ხდის. პროექტის განხორციელებაში ევროპის საბჭოს მიერ მოწვეული ადგილობრივი და საერთაშორისო ექსპერტები ჩაერთვებიან. ინიციატივის მიზანია აღნიშნული მიმართულებით ხელი შეუწყოს სამსახურის შესაძლებლობების, პროფესიული რესურსისა და მიზნობრივ ჯგუფებთან თანამშრომლობის გააქტიურებას. პროექტი მოიცავს სახელმწიფო ინსპექტორის სამსახურის საჭიროებების კვლევას, პრაქტიკისა და საკანონდებლო ჩარჩოს ანალიზს, სამსახურისთვის სტრატეგიული ხედვის მომზადებას, თანამშრომელთა კვალიფიკაციის ამაღლებასა და სხვა სამომავლო ინიციატივების მხარდაჭერას. დისტანციური შეხვედრის ფარგლებში, მონაწილეები დეტალურად გაეცნენ სახელმწიფო ინსპექტორის სამსახურის ხედვასა და თანამშრომლობის შესაძლებლობებს. შიდა რესურსის გაძლიერებასთან ერთად, სამსახურის მიზანია ხელი შეუწყოს ერთიანი მიდგომების ჩამოყალიბებას და კოორდინირებულ საქმიანობას, ტექნოლოგიების განვითარების სწრაფი ტემპის კვალდაკვალ - პერსონალური მონაცემების დაცვის უზრუნველყოფის მიზნით. ღონისძიების ფარგლებში, საინტერესო დისკუსია გაიმართა ხელოვნურ ინტელექტზე დაფუძნებული ტექნოლოგიების დანერგვისა და გამოყენების პროცესში პერსონალური მონაცემების, პირადი ცხოვრების ხელშეუხებლობისა და სხვა დემოკრატიული ღირებულებების დაცვის მნიშვნელობაზე. ამასთან, მონაწილეებმა ერთმანეთს საკუთარი გამოცდილება გაუზიარეს და სამომავლო თანამშრომლობის პერსპექტივებზე შეთანხმდნენ.