სასწავლო კურსი სამართალდამცავი ორგანოების წარმომადგენელთა პროფესიული შესაძლებლობების გაძლიერებას ისახავდა მიზნად, რაც თავის მხრივ აღნიშნულ სექტორში ადამიანის უფლებების დაცვის, მათ შორის პირადი ცხოვრების ხელშეუხებლობისა და მონაცემთა დაცვის სტანდარტის ამაღლებასა და ხარისხის გაუმჯობესებას განაპირობებს.

წარმატებულ კურსდამთავრებულებს სერტიფიკატები სახელმწიფო ინსპექტორის მოადგილემ, სოფიო ჯიაძემ და საქართველოში ევროპის საბჭოს ოფისის ხელმძღვანელის მოადგილემ, ვაჰაგ მურადიანმა გადასცეს.

რამდენიმეთვიანი ინტენსიური სწავლება შინაგან საქმეთა სამინისტროს, პროკურატურის, თავდაცვის სამინისტროს, იუსტიციის სამინისტრო სპეციალური პენიტენციური სამსახურის, სახელმწიფო უსაფრთხოების სამსახურისა და ფინანსთა სამინისტროს საგამოძიებო სამსახურის 30–მა წარმომადგენელმა გაიარა. 

სასწავლო პროგრამა აერთიანებდა პირადი ცხოვრებისა და მონაცემთა დაცვის ევროპულ რეგულაციებსა და სასამართლო პრაქტიკას. ის, ასევე მოიცავდა ამ სფეროში შიდასახელმწიფოებრივ საკანონმდებლო სტანდარტებს, სამართალდამცავ სექტორში არსებულ პრაქტიკასა და რეკომენდაციებს.

სასწავლო პროცესს სახელმწიფო ინსპექტორის სამსახურის წარმომადგენელი, მარიამ ელყანაშვილი უძღვებოდა.

სამართალდამცავი ორგანოების მიერ პირადი ცხოვრების ხელშეუხებლობისა და პერსონალური მონაცემების დაცვას სახელმწიფო ინსპექტორის სამსახური დიდ ყურადღებას უთმობს. საჯარო და კერძო სექტორის წარმომადგენლების კვალიფიკაციის ამაღლებაზე ზრუნვასა და შესაბამისი სასწავლო პროგრამების დანერგვას სამსახური მომავალშიც აქტიურად გააგრძელებს.