,,პერსონალურ მონაცემთა დაცვის ელჩებმა“ ცნობიერების ამაღლების მიზნით თბილისსა და რეგიონებში დისტანციური შეხვედრები გამართეს
2020-12-31 10:58:18
მიმდინარე წელს, პანდემიის მიუხედავად, ,,პერსონალურ მონაცემთა დაცვის ელჩების“ მონაწილეობით დისტანციური შეხვედრები გაიმართა თბილისში, დასავლეთ საქართველოსა და სამცხე-ჯავახეთში. გამართულ შეხვედრებსა და დისტანციურ ჩართვებში „პერსონალურ მონაცემთა დაცვის ელჩები“ - გიორგი ლაზარიაშვილი, ნინო ბოჭოიძე, ლუკა ხალაძე, დონარი ლონდარიძე, ქეთევან ქოჩიაშვილი, ნათია ეგუტიძე და გიორგი აბულაძე მონაწილეობდნენ.საინფორმაციო შეხვედრების ფარგლებში განხილულ იქნა სხვადასხვა სფეროში პერსონალურ მონაცემთა დაცვის მნიშვნელობა, მათი არაკანონიერი მოპოვების, გამოყენების, გავრცელების ან სხვაგვარი დამუშავების გავლენა ადამიანის უფლებებზე და მონაცემთა დაცვის სფეროში სახელმწიფო ინსპექტორის სამსახურის უფლებამოსილება.
პერსონალურ მონაცემთა დაცვის საკითხზე საზოგადოების ცნობიერების ამაღლება სახელმწიფო ინსპექტორის სამსახურისთვის ერთ-ერთ მთავარ გამოწვევას წარმოადგენს. ინფორმაციის ხელმისაწვდომობის გაზრდა განსაკუთრებით აქტუალურია რეგიონებში. სწორედ ამ მიზნით დაიწყო სამსახურმა 2020 წელს ,,პერსონალურ მონაცემთა დაცვის ელჩების“ პროექტი, რომლის ფარგლებში სამსახურის მიერ, კონკურსის საფუძველზე, მთელი ქვეყნის მასშტაბით, სხვადასხვა უმაღლესი სასწავლებლიდან 20-მდე სტუდენტია შერჩეული.
,,პერსონალურ მონაცემთა დაცვის ელჩების“ პროექტი საზოგადოების ცნობიერების ამაღლებასთან ერთად, სტუდენტების განვითარების ხელშეწყობასა და ახალგაზრდა თაობის პერსონალურ მონაცემთა დაცვის საკითხით დაინტერესებასაც ისახავს მიზნად.2021 წლიდან სამსახური აღნიშნული ფორმატის გააქტიურებასა და რეგიონული დაფარვის გაფართოებას გეგმავს.