პერსონალურ მონაცემთა დაცვის ინსპექტორის აპარატი, გაეროსა და ევროკავშირის ერთობლივი პროექტის „ადამიანის უფლებები ყველასათვის“ ფარგლებში, აცხადებს მონაწილეთა მიღებას პერსონალურ მონაცემთა დაცვის საკვირაო სემინარზე,რომელიც განკუთვნილია ჟურნალისტიკისა და მასობრივი კომუნიკაციის სფეროში მომუშავე პროფესორ-მასწავლებლებისთვის. საკვირაო სემინარები გაიმართება იუსტიციის სასწავლო ცენტრში, ქ. ყვარელში 6-7 მაისს.

საკვირაო სემინარის მიზანი

პერსონალურ მონაცემთა დაცვის საკვირაო სემინარის მიზანია, საქართველოში აკრედიტებული უმაღლესი სასწავლებლების ჟურნალისტიკისა და მასობრივი კომუნიკაციის მიმართულებით მომუშავე აკადემიური პერსონალის ცნობიერების ამაღლება და პერსონალურ მონაცემთა დაცვის თემაზე აკადემიური და საჯარო დისკუსიის ხელშეწყობა, ჟურნალისტური საქმიანობის პროცესში პერსონალურ მონაცემთა დაცვის საერთაშორისო სტანდარტების გამოყენების უზრუნველყოფა.

ვის შეუძლია მონაწილეობის მიღება?

სემინარი განკუთვნილია საქართველოს უმაღლესი სასწავლებლების პროფესორ-მასწავლებლებისათვის, რომლებიც აკადემიურ საქმიანობას ეწევიან ჟურნალისტიკისა და მასობრივი კომუნიკაციის, მედიის კვლევების მიმართულებით.

კურსის შედეგები

საკვირაო სემინარის გავლის შემდეგ მსმენელებს ექნებათ ამომწურავი ინფორმაცია პერსონალურ მონაცემთა დაცვის კონცეფციისა და პრინციპების და ჟურნალისტური საქმიანობის განხორციელების პროცესში მათი გამოყენების შესახებ, გაეცნობიან პერსონალურ მონაცემთა დაცვის ევროპულ სისტემას, პერსონალურ მონაცემთა დაცვის პრაქტიკას ჟურნალისტურ საქმიანობაში, რაც მათ სასწავლო, სამეცნიერო და კვლევით საქმიანობას უფრო ეფექტურს გახდის.

საკვირაო სემინარის დასრულების შემდეგ მონაწილეებს ექნებათ თეორიული და პრაქტიკული ცოდნა შემდეგი მიმართულებით:

• საქართველოში პერსონალურ მონაცემთა დაცვის მექნიზმები და პრაქტიკა;
• პერსონალურ მონაცემთა დაცვის ევროპული სისტემები და მექანიზმები;
• „პერსონალური მონაცემების ავტომატური დამუშავებისას ფიზიკური პირების დაცვის შესახებ“ კონვენცია და მისი მექანიზმები;
• პერსონალურ მონაცემთა დაცვის პრინციპების უზრუნველყოფა ჟურნალისტიკაში.

მონაწილეების შერჩევა

სემინარის მონაწილეებს შეარჩევს სპეციალური კომისია.

კურსის დასრულების შემდეგ ყველა მონაწილეს გადაეცემა სერტიფიკატი.

საკვირაო სემინარში მონაწილეობა უფასოა. სემინარში მონაწილეობის, განთავსებისა და მგზავრობის ხარჯებს უზრუნველყოფს გაეროსა და ევროკავშირის ერთობლივი პროექტი „ადამიანის უფლებები ყველასათვის“.

საკვირაო სემინარები ტარდება გაეროს ერთობლივი პროგრამის და ევროკავშირის მხარდაჭერით „ადამიანის უფლებები ყველასათვის“(ადამიანის უფლებების დაცვის ეროვნული სტრატეგიისა და სამოქმედო გეგმის განხორციელებისა და მონიტორინგის ხელშეწყობა) პროექტის ფარგლებში და იუსტიციის სასწავლო ცენტრთან თანამშრომლობით.

დეტალური ინფორმაცია იხილეთ ბმულზე.